Бүгінде KazGASA — жай ғана сәулет университеті емес, Қазақстанда жаңа инженерлік мектепті қалыптастырып отырған орталық. Мұнда білім беру саланың технологиялық өзгерістерімен тікелей байланысты BIM, жасанды интеллект, дрондар, роботтандыру және сейсмикалық қауіпсіздік сияқты бағыттар оқу үдерісіне жүйелі түрде енгізілген.
Экономиканың қарқынды цифрлық трансформациясы мен білім беру жүйесіндегі ауқымды реформалар аясында академия мемлекеттік деңгейде қалыптасып жатқан жаңа тәсілдерді іс жүзінде жүзеге асыруда. Нәтижесінде мұнда мамандар даярлаудың жаңа моделі қалыптасқан және ол тәжірибеге бағытталған, технологиялық және саланың нақты процестерімен тығыз интеграцияланған.
KazGASA болашақ құрылыс саласын айқындайтын BIM-модельдеу, цифрлық жобалау, 3D-басып шығару, сәулеттегі жасанды интеллект, сандық өндіріс және роботтандыру сынды негізгі технологияларға басымдық береді. Бұл бағыттар білім беру бағдарламаларының өзегіне айналып, еңбек нарығында сұранысқа ие жаңа буын мамандарын қалыптастыруға негіз болады.
Практикалық дайындық – академияның басты басымдығының бірі. FabLab пен дрондар зертханасында студенттер жобалау, мониторинг және құрылыс процестерін басқарудың заманауи құралдарын меңгереді. Сонымен қатар, академия индустриямен бірлесе және осы құзыреттерді кеңейте отырып, құрылыс компаниялары үшін біліктілікті арттыру бағдарламаларын іске асыруда.
2026 жылдан бастап Қазақстанда BIM-технологияларын міндетті енгізу құрылыс саласының жаңа стандарттарын қалыптастырады. Осыған сәйкес KazGASA білім беру бағдарламаларын алдын ала бейімдеп, студенттерге жобаның барлық кезеңінде, яғни, жобалаудан бастап пайдалануға дейінгі бірыңғай цифрлық ортада жұмыс істеу дағдыларын қалыптастыруда. Бұл шешімдер құрылыс сапасын арттыруға, қателерді азайтуға және шығындарды қысқартуға мүмкіндік береді.
Академия индустриямен белсенді ынтымақтастық орнатып, B2B форматындағы жобаларды іске асыруда. Сонымен қатар, әлеуметтік жауапкершілік аясында құрылыс компаниялары үшін заманауи технологиялар бойынша тегін оқыту бағдарламаларын жүргізіп, қалалық ортаның қауіпсіздігін арттыруға үлес қосып отыр. KazGASA сондай-ақ ЮНЕСКО және ИСЕСКО аясындағы мәдени мұраны сақтау жөніндегі кешенді жоспарға қатысып, тарихи-мәдени нысандарды сақтау бойынша мамандар даярлауда.
Халықаралық бағыт та қарқынды дамып келеді. Академия қос диплом бағдарламаларын жүзеге асырып, түркі кеңістігі мен жаһандық білім беру ортасымен интеграцияны күшейтуде.
Инженерлік кадрларға сұраныстың артуы жағдайында мемлекет құрылыс бағыттары бойынша білім беру гранттарының санын ұлғайтуда. KazGASA осы үдерісте жүйе құраушы жоғары оқу орны ретінде жаңа буын мамандарын даярлау жауапкершілігін өз мойнына алып отыр.
Академияның бұл тәсілінің тиімділігі нақты нәтижелермен расталады. Өйткені, KazGASA «Атамекен» ҰКП рейтингінде жетекші орындарды иеленіп, QS Stars халықаралық агенттігі тарапынан академиялық бағдарламалардың даму деңгейі бойынша жоғары бағаланған.
45 жылдық мерейтой қарсаңында KazGASA өткен жолын қорытындылап қана қоймай, Қазақстанның құрылыс саласының болашағын қалыптастыратын негізгі орталықтардың бірі ретіндегі рөлін нығайтып отыр.
14 сәуірде Almaty Theatre сахнасында академияның 45 жылдығына арналған салтанатты кеш өтті. Іс-шара аясында Қазақстан Республикасының ғылым және жоғары білім министрі Саясат Нұрбектің қатысуымен KazGASA Қамқоршылар кеңесінің отырысы ұйымдастырылды.
Министр өз сөзінде инженерлік білім берудің маңыздылығын атап өтіп,
«Күшті білім беру институттары сабақтастыққа, берік академиялық дәстүрлерге және үздіксіз дамуға негізделеді. Академия алдағы уақытта да кадр даярлау мен кәсіби өсудің маңызды орталығы ретінде өз әлеуетін нығайта беретініне сенімдімін», — деді.
Кеш барысында марапаттау рәсімі өтіп, салаға үлес қосқан тұлғаларға құрмет көрсетілді. Халықаралық серіктестердің бейнеқұттықтаулары ұсынылып, студенттердің шығармашылық қойылымдары мен академияның тарихы мен болашағын бейнелейтін арнайы фильм көрсетілді.
KazGASA Баспасөз қызметі
