Еліміздің білім беру саласында қазақтың қара шаңырағына айналған әл-Фараби атындағы Қазақ ұлттық университетінде «Фараби әлемі» атты студенттер мен жас ғалымдардың халықаралық ғылыми конференциясы дәстүрлі түрде жыл сайын өткізіліп келеді. Сол ретте 2023 жылдың 6 сәуірінде халықаралық қатынастар факультетінде «Фараби әлемі» аясында халықаралық қатынастар факультетінің тұңғыш деканы Г.Ш.Жамбатырованың 80-жылдығына арналған V Жамбатырова оқулары «Қазіргі геосаяси үдерістер және халықаралық қауіпсіздік жағдайы» атты тақырыпта конференция өткізілді.
Конференцияның мақсаты студенттеріміздің білімін шыңдау және халықаралық қатынастардағы өзекті мәселелерді зерттеуге деген қызығушылығын арттыра отырып, жобалық және ғылыми-зерттеу жұмыстарының деңгейін одан әрі жетілдіру мақсатында тәжірибе алмасу, студенттердің пікірталас жүргізу дағдыларын қалыптастыру, сондай-ақ халықаралық әлемдік саясаттағы оқиғалар мен мәселелерге қатысты өздерінің дербес көзқарастарын айтуға, сараптама жасауға үйрету.
Конференцияға халықаралық қатынастар факультеттерінің оқытушы профессорлары мен студенттері және еліміздің басқа да жоғары оқу орындарының студенттері қатысты. Жамбатырова Гүлжаухар Шағатайқызының әріптестері мен шәкірттері ұлағатты ұстаздың ғибратты ғұмыры жайлы өз естеліктерімен бөлісе отырып, Гүлжаухар Шағатайқызы туралы фильмді тамашалады.
Конференция барысында ұсынылған баяндамалар үлкен қызығушылықпен талқыға түсті. Қатысушылар ұсынылған көкейкесті мәселелер бойынша өздерін қызықтыратын сауалдарын қоя отырып, өз ойларымен бөлісіп, пікір алмасты. Студенттердің бүгінгі халықаралық қатынастар саласындағы өзекті мәселелер бойынша өз болжамдарын ортаға салуы, олардың баяндамаларының сапасын арттыра түсті, конференция жұмысын қорытындылау барысында жеңімпаздарды анықтау әділқазылар алқасына оңай болмады.
Конференция нәтижесі бойынша бірінші орынды халықаралық қатынастар мамандығының 3 курс студенті Ғалымов Жанболат иеленсе, екінші орынды 4 курс студенті Абухан Ғазиза мен 3 курс студенті Мәлікова Айкөркем бөлісті, ал үшінші орынды 3 курс студенттері Ерболат Нұрай, Нуртазинова Сания және «Нархоз» университетінің 2 курс студенті Базарбаев Расул еншіледі.
Конференция барысы студенттердің ғылыми негізде жан-жақты дербес сараптама жасай алатындығын көрсете отырып, олардың болашақта білікті маман болып шығатындықтарына ешқандай күмән туғызбайды.
А. Р. Әліпбаев, Б. З. Бөжеева
әл-Фараби атындағы ҚазҰУ,
халықаралық қатынастар факультетінің доценттері
