Қазақ ұлттық қыздар педагогикалық университетінде 20.05.2026–08.06.2026 аралығында «Мектеп – университет – нарық: білім берудің жаңа архитектурасы» атты педагогикалық идеялар фестивалі өтуде.
Фестиваль аясында халықаралық симпозиумдар, ғылыми конференциялар, директорлар форумы, цифрлық сауаттылық воркшоптары және халықаралық ұйымдармен бірлескен алаңдар ұйымдастырылып, білім беру жүйесінің жаңа бағыттары талқылануда.
Университет басшылығының атынан фестивал қатысушыларын QyzPU-дың Академиялық мәселелер жөніндегі проректор Суатай Сәбит Құрманжанұлы құттықтап, білім ордасының цифрлық трансформациядағы рөлін атап өтті. «Қазіргі жаһандық өзгерістер кезеңінде университеттердің рөлі тек кәсіби маман даярлаумен шектелмейді. Университет – қоғамның дүниетанымдық, мәдени және интеллектуалдық сапасын қалыптастыратын стратегиялық институтқа айналуы тиіс. Осы тұрғыдан алғанда, педагогикалық идеялар фестивалі аясында білім берудің жаңа архитектурасын тек академиялық реформалар деңгейінде ғана емес, тұлғаның мәдениеті, дүниетанымы, интеллектуалдық дамуы және әлеуметтік жауапкершілігі тұрғысынан қарастыруды мақсат етеді.», – деді проректор.
Іс-шараның басты мақсаты – білім беру саласындағы заманауи өзгерістерді саралап, ғылым, мәдениет және халықаралық академиялық ынтымақтастықты дамыту. Сонымен қатар, «Халықаралық түрік мәдениеті, өнері және мәдени мұрасы» атты XX халықаралық симпозиум аясында түркі халықтарының ортақ тарихи-мәдени құндылықтары кеңінен насихатталуда.
ҚызПУ Баспасөз қызметі
